Wia dis foto come from, JAMB/Facebook
Di Joint Admissions and Matriculation Board (Jamb) don release di result for di 2025 Unified Tertiary Matriculation Examination early mor-mor on Friday, May 9, 2025.
Candidates wey seat for di exam go fit begin check dia result.
Jamb bin tok say about 1.5 million candidates perform below 200 dis figures na one of di lowest in recent times.
According to di analysis, na only 4,756 candidates score 320 and above, and anoda 12,414 candidates score 300 and above.
Now wey di exam board don officially release candidates result, dem fit check dia score through dis method.
For 2022 UTME, Jamb announce say, 378,639 candidates score above 200, 520,596 score 190 and above, while 704,991 score 180 and above.
Also, 934,103 score 170 and above and 1,192,057 score 160 and above.
For 2024, a total of 1,904,189 candidates sit down for UTME. 1,989,668 register for di exam, wey be 24.7% higher dan di figure for 2023.
According to Jamb, out of di 1,842,464 results wey dem release, only 0.4 percent score above 300, while 24 percent score 50 percent (200/400) and above.
As dem see dis kain low scores since for 2019 UTME, Jamb and institutions come conclude say make dem reduce and approve national minimum cut-off mark of 160 for university admission for Nigeria.
Again for 2022/2023 admission session, Jamb come set di general cut-off mark for universities at 140 and above, as dem see say candidates underperform dat year again.
And for dis year data, Jamb show say out of 1.5 million candidates wey write di exam, over 50 percent score below 200 for this year exam.
Once JAMB officially release di results candidates fit check dia score through dis method.
SMS method:
Send "RESULT" to 55019 or 66019 wit di phone number you use to register.
You go receive SMS wit your score details.
Wit dis method candidates no go need to go any CBT centre or cybercafé to go check dia results.
Anoda way you fit check na via di Jamb website:
Visit di JAMB Result Portal, den you go into di official Jamb result-checking portal.
Afta, you go enta your details, di phone number wey you use during registration or your registration number.
You go click on check my result, dis go instantly display your Jamb result
You fit screenshot di result or print am out from di website afta you don pay di the required payment.
If you experience any delay during dis process, check your internet connection.
However, di results wey dem still dey process and di ones wey dey absent go receive message like "under processing" and "absent" respectively.
Those wey dey under investigation go receive:
Afta you don see your results, you go need visit your tertiary institution of choice, website for dia cut-off marks for di course wey you wan study.
If you meet di required score, begin prepare for post-UTME screening or admission process.
If you score lower, you get di option to change institution, course or wait for anoda year to write Jamb.
Jamb-UTME na di national examination wey Nigerians, dey use gain admission within di country eventhough institution get di liberty to conduct dia own entrance examinations.
Currently, Jamb don peg dia cut-off marks for admission into universities as140, while admission into polytechnics and colleges of education go be100.
Some universities don peg dia score as high as 200 but Jamb no fit interfere in di admission process, but some candidate don ask Jamb make dem review dia scores ontop social media.
Franklin Chibuikem ontop X say make Jamb recall di result wey dem release becos im score dey low.
"Pls jamb, conduct recall on di results you just release, becos di score I dey see no be mine becos I write UTME MOCK and I score 246 ,and my result last year na 226, and I just check dis morning and I dey see 156. How??? E no dey not possible," e tok.
Anoda candidate don accuse Jamb say dem dey sell di result of dia candidate.
Honest Joshua ontop X tok say im score above 200 for im mock exam, im no expect say e go score below 150.
"If pipo no speak up jamb no go do anything… We no kill anyone by writing in di east. Jamb dis no be my result di mock wey dey harder dan di main exam and I get 298? Wetin happun to my main exam? How e go be 143?. You guys dey sell our results?
Now, wey di performance of students dey low, institution fit begin offer admission below di average score of di examination wey be 200 so dem go fit cover for di institution financial year.
Many Nigerians including experts in di educational sector dey fear about di quality of education in dis kontri.
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.
End of X post, 1
Content is not available
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.
End of X post, 2
Content is not available
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.
End of X post, 3
Content is not available
According to some educationist experts, dem believe say di major reason why candidates dey underperform for Jamb na sake of say dem no dey serious before di UTME.
Educationist Dr Babangida Sa'idu from Faculty of Education and Extension Services for Usmanu Danfodiyo University Sokoto, blame candidates and dia parents say dem dey allow children neglect dia studies before UTME.
"Di main wahala wey dey cause underperformance na say candidates and dia parents no dey serious. Nowadays, UTME candidates no dey focus on dia studies before dem write di exams," na wetin Dr Sa'idu tok.
Dr. Sa'idu come add say, "As for parents, dem no dey monitor how dia children dey use dia time before UTME exams."
E also tok say many times, wen dem reach CBT centres, dem go see candidates dey press phone or dey take selfie.
"Sometimes I don see candidates for CBT centres dey take selfie, dey post for social media say dem come write JAMB, instead make dem dey read for di exam. And I believe na one of di main reason why dem dey just dey randomly guess answers for exam," na wetin e add.
E come add say anoda wahala be say many candidates, especially those wey come from village areas, no sabi use computer.
"Another issue be say you go see many candidates wey no sabi operate computer. Dis one dey always make dem dey click anyhow for computer wen dem dey answer JAMB questions," Dr Sa'idu talk.
Dr Babangida Sa'idu believe say parents get big role to play to help solve dis underperformance from candidates wey dey write di exam.
"I believe say parents be di major stakeholders and dem get big role wey fit help bring out di best from their children to make dem get better results," e tok.
E add say candidates suppose understand say dem no fit just dey guess answers if dem want get good result, and say guessing no go work for university level.
"Candidates suppose know say to dey guess answers no go give dem good result, and e no go work for university. I dey advise dem make dem read and study well before dem reach CBT centres," Dr Sa'idu add.
E still call on goment say dem need make better arrangement to educate and train candidates, especially those wey no sabi use computer.
"Government suppose provide centres wey go train candidates wey no sabi operate computer," im tok.
© 2025 BBC. De external site no concern BBC. De way wey we de take go external link.

source